Հայաստանի իրավասու դատարան է ուղարկվել «Բարգավաճ Հայաստան» կուսակցության առաջնորդ Գագիկ Ծառուկյանի փեսայի՝ Կարապետ Գուլոյանի նկատմամբ հարուցված քրեական գործը։ Այս մասին հայտնում է ՀՀ գլխավոր դատախազության մամուլի ծառայությունը՝ նշելով, որ հսկող դատախազը հաստատել է մեղադրական եզրակացությունը։
Գլխավոր դատախազության հաղորդագրության համաձայն՝ Կարապետ Գուլոյանի նկատմամբ հանրային քրեական հալածանք է հարուցվել՝ բռնագրավված գույքի հետ կապված ապօրինի գործողություններ կատարելու փաստի առթիվ։
Գործը հարուցվել է այն բանից հետո, երբ 2026 թվականի մայիսի 12-ին օրինական ուժի մեջ է մտել որոշումը, համաձայն որի՝ Հայաստանի Հանրապետության սեփականության իրավունքը գրանցվել է Կոտայքի նախկին մարզպետ և Աբովյան համայնքի նախկին ղեկավար Կարապետ Գուլոյանի և նրա կնոջ՝ Ռոզա Ծառուկյանի՝ Կոտայքի մարզի Առինջ գյուղում գտնվող գույքի 91 տոկոսի նկատմամբ։
Հակակոռուպցիոն դատարանը Կարապետ Գուլոյանի նկատմամբ կիրառել էր հայցի ապահովման միջոց՝ արգելանք՝ ապօրինի ձեռք բերված գույքի բռնագրավման վարույթի շրջանակներում։ Այսպիսով, նրան արգելված էր կատարել որևէ գործողություն՝ կապված տվյալ գույքի տնօրինման հետ։
Սակայն, ինչպես նշվում է հաղորդագրության մեջ, Կարապետ Գուլոյանը կազմակերպել է բնակելի տան արտաքին և ներքին պատերի, ինչպես նաև նկուղի պատերի վնասումը։ Նա կազմակերպել է պատերի երեսպատման սալիկների ապամոնտաժումը, դռների և պատուհանների հանումը, վնասել է տան ներքին հարդարանքը, ներառյալ էլեկտրական լարանցումները, ներքին պատերի և առաստաղի հարդարանքը, մանրահատակը, ինչպես նաև բակում գտնվող լողավազանը և տան տանիքածածկը։
Այս գործողությունների հետևանքով պետությանը պատճառվել է առնվազն 229 միլիոն դրամի վնաս։
2026 թվականի հունիսի 10-ին Կոտայքի մարզի առաջին ատյանի ընդհանուր իրավասության դատարանը Կարապետ Գուլոյանի նկատմամբ որպես խափանման միջոց է ընտրել տնային կալանքը՝ մեկ ամիս ժամկետով։ Նա ազատ է արձակվել 20 միլիոն դրամ գրավի դիմաց։ Դատախազը դատարան կներկայացնի հայց՝ պետությանը պատճառված վնասի փոխհատուցման պահանջով։
