Հունիսի 17-ին «Զառ» ուսումնական կենտրոնում պաշտոնապես մեկնարկել է «Արծիվ գործընկեր-2026» միջազգային զորավարժությունը։ Այս տարվա զորավարժությունը նշանավորվում է մասնակիցների կազմի ընդլայնմամբ, որտեղ, բացի Հայաստանի զինված ուժերի խաղաղապահ բրիգադի և ԱՄՆ զինված ուժերի ներկայացուցիչներից, իրենց ուժերը փորձում են նաև Ֆրանսիայի և Հունաստանի զինված ուժերի ստորաբաժանումները։
Զորավարժությանը ներգրավված զինծառայողներին ողջունել է ՀՀ ԶՈՒ գլխավոր շտաբի պետի տեղակալ, գեներալ-մայոր Արթուր Երոյանը։ Որպես պաշտոնական մեկնարկի նշան հնչել են Հայաստանի, ԱՄՆ, Ֆրանսիայի և Հունաստանի պետական օրհներգերը, ինչպես նաև «Արծիվ գործընկեր» զորավարժության հատուկ օրհներգը։
«Արծիվ գործընկեր» զորավարժության շարքին են միացել ՀՀ ԶՈՒ խաղաղապահ բրիգադի, Եվրոպայում և Աֆրիկայում ԱՄՆ ցամաքային զորքերի ու Կանզասի ազգային գվարդիայի, ինչպես նաև Ֆրանսիայի և Հունաստանի զինված ուժերի զինծառայողները։
Զորավարժության հիմնական նպատակներն են միջազգային խաղաղապահ առաքելություններում մասնակցելու համար նախապատրաստվող ստորաբաժանումների փոխգործակցության մակարդակի բարձրացումը, կառավարման և մարտավարական հաղորդակցման լավագույն փորձի փոխանակումը, ինչպես նաև Հայաստանի խաղաղապահ ստորաբաժանման պատրաստվածության ամրապնդումը։
Հայաստանում ԱՄՆ դեսպանատունը նշել է, որ այս զորավարժությունը հայ-ամերիկյան երկարամյա պաշտպանական համագործակցության չորրորդ ամենամյա նախագիծն է, որը նպատակ ունի աջակցել միջազգային խաղաղապահ առաքելություններին նախապատրաստման գործընթացին։ Զորավարժությունը կանցկացվի հունիսի 17-25-ը։
Համատեղ բազմակողմ վարժանքների միջոցով «Արծիվ գործընկեր-2026» զորավարժությունը նպատակ ունի բարձրացնելու մասնակիցների փոխգործակցության մակարդակը, նպաստելու լավագույն փորձի փոխանակմանը և ամրապնդելու խաղաղապահների պատրաստվածությունը։
